Vengriyada parlament saylovlari: Orban mag‘lubiyatini tan oldi

Vengriya bosh vaziri Viktor Orban parlament saylovlarida hukmron “Fides” koalitsiyasi mag‘lubiyatga uchraganini tan oldi va muxolifatdagi “Tisa” partiyasini g‘alaba bilan tabrikladi. Bu haqda Reuters xabar bermoqda.

 

Milliy saylov byurosi (NVI) ma’lumotlariga ko‘ra, 12-aprel, yakshanba kechqurun holatiga ko‘ra, ovozlarning 81,49 foizi sanalgach, muxolifatchi Peter Madyar boshchiligidagi “Tisa” partiyasi Vengriya parlament saylovlarida yetakchilik qilmoqda. 

 

Qayd etilishicha, saylovda 5,8 milliondan ortiq fuqaro ishtirok etgan. Saylovchilar faolligi rekord darajada — 77,8 foizni tashkil etdi. Mamlakatning yangi bosh vaziri kim bo‘lishi 30 kun ichida ma’lum bo‘lishi kutilmoqda.

 

Hozirda Peter Madyar boshchiligidagi “Tisa” partiyasi parlamentdagi 199 o‘rindan 137 tasini qo‘lga kiritmoqda. Amaldagi bosh vazir Viktor Orban rahbarlik qilayotgan “Fides” partiyasi hamda uning ittifoqchisi Xristian-demokratik xalq partiyasi (KDNP) esa 55 o‘ringa ega bo‘lmoqda. Yana 7 o‘ringa o‘ta o‘ngchi “Bizning vatan” harakati da’vogarlik qilmoqda. Shu tariqa, “Tisa” parlamentda uchdan ikki qismdan ortiq o‘rinni egallab, konstitutsiyaviy ko‘pchilikni ta’minlamoqda.

 

Muxolifat yetakchisi Madyarning bildirishicha, Orban uni saylovdagi g‘alaba bilan allaqachon tabriklagan.

 

O‘z navbatida, Orban Budapesht shahrida tarafdorlari oldida so‘zga chiqib, dastlabki natijalarni “aniq” va “alamli” deb baholadi. 

 

“Men g‘olib bo‘lgan partiyani tabrikladim. Biz muxolifatda bo‘lsak-da, Vengriya xalqiga va vatanimizga xizmat qilishda davom etamiz”, — dedi u. 

 

Bu natija Orban uchun so‘nggi 16-yil ichidagi ilk mag‘lubiyat sifatida qayd etilmoqda.

 

62 yoshli Orban 2010-yildan buyon hokimiyat tepasida edi. Joriy saylovlarda esa 45 yoshli Peter Madyar ilk bor jiddiy raqobatchi sifatida maydonga chiqdi. U avval “Fides” partiyasining yoshlar qanotida faoliyat yuritgan, “Tisa” partiyasiga esa ikki yil avval rahbarlikni qo‘lga olgan.

 

Saylovchilar orasida Orban hukumatidan norozilik sabablari sifatida jamoat infratuzilmasi, sog‘liqni saqlash va ta’lim tizimlaridagi muammolar, shuningdek korrupsiya holatlari ko‘rsatilmoqda. Madyar esa korrupsiyaga qarshi keskin kurashish, tizimli islohotlar o‘tkazish va yangi konstitutsiya qabul qilish niyatini bildirgan.

 

Shuningdek, u Vengriyaning Rossiyadan masofa saqlashi, hamda Yevropa Ittifoqi a’zosi sifatida NATO doirasida ishonchli ittifoqchi maqomini tiklash tarafdori ekanini ta’kidlagan.

 

Reuters g‘olib partiya yetakchisi Peter Madyar bolaligida, 1990-yilda Vengriyaning birinchi demokratik saylovlaridan hayajonlanib, o‘sha paytda kommunizmga qarshi kurashuvchi Viktor Orbanning suratini yotoqxona devoriga yopishtirib qo‘yganini yozmoqda.