Ispaniyada Pasxa marosimida Netanyaxu timsolidagi haykal portlatib yuborildi
Haykalga "millat qotili" kabi keskin mazmundagi yozuvlar yopishtirilgan.
Ispaniya janubidagi El Burgo shahrida Pasxa oldidan o‘tkazilgan Muqaddas hafta tadbirlari doirasida Benyamin Netanyaxu timsolidagi haykal portlatib yuborildi.
Mahalliy hokimiyat ma’lumotiga ko‘ra, haykal ichiga joylashtirilgan 13.9 kg portlovchi moddalar yordamida omma ko‘z o‘ngida portlatilgan. Haykalga "millat qotili" kabi keskin mazmundagi yozuvlar ham biriktirilgani qayd etilgan.
Shahar meri Mariya Dolores ushbu harakatni mahalliy diniy-an’anaviy marosim — “Yahudoni yoqish” urf-odatining bir qismi sifatida izohlagan.
“Bu urushga qarshi ramziy xabar hisoblanadi. Har yili biz yovuzlikni ifodalovchi obrazni tanlaymiz”, — deya ta’kidlagan u.
Mazkur marosim uzoq yillardan buyon katolik an’analari doirasida o‘tkazib kelinadi.
