Tojikiston transplantatsiya markazi O‘zbekistondagi organ savdosi bilan aloqadorligini rad etdi
Avvalroq, o‘zbekistonlik er-xotin ijtimoiy tarmoqlar orqali donorlarni jalb qilishi va ularni transplantatsiya uchun Tojikistonga yuborishi haqida xabar berilgan edi.
O‘zbekistonda inson organlari savdosi bilan shug‘ullanuvchi jinoiy guruh faoliyati bo‘yicha tergov olib borilayotgan bir paytda, Tojikiston Milliy organ va to‘qimalarni transplantatsiya qilish ilmiy markazi (Istiqlol klinikasi) muassasaning noqonuniy jarrohlik amaliyotlari bilan aloqasi yo‘qligini rasman maʼlum qildi.
Avvalroq, O‘zbekiston Ichki ishlar vazirligi va Davlat xavfsizlik xizmati ijtimoiy tarmoqlar orqali donorlarni jalb qilgan va ularni transplantatsiya uchun Tojikistonga yuborgan jinoiy guruh faoliyatini to‘xtatgani xabar qilingan edi. Tergov maʼlumotlariga ko‘ra, bu sxema ilgari sudlangan 37 yoshli erkak va uning rafiqasi tomonidan tashkil etilgan. Ular yordam va xayriyaga chaqiruvchi videolar orqali moliyaviy qiyinchilikda bo‘lgan shaxslarni nishonga olib, ularning organlarini sotishni taklif qilgan.
Markaz direktori Saidmahmud Ismoilzoda Asia-Plus nashriga bergan bayonotida muassasaning faoliyati milliy qonunchilik va xalqaro bioetika standartlariga muvofiq tashkil etilishini taʼkidladi. Har bir transplantatsiya jarayoni bir nechta bosqichli tekshirishni o‘z ichiga oladi: donor va qabul qiluvchining oilaviy munosabatlari, rasmiy hujjatlar orqali tasdiqlanadi, tibbiy ko‘rikdan tashqari psixologik baholashdan o‘tkaziladi va Sog‘liqni saqlash vazirligi mustaqil axloq komissiyasi tomonidan yakuniy ruxsat beriladi.
Markaz barcha bosqichlarni rasmiy bayonnomalarda qayd etishni, shuningdek, noqonuniy jarayonlar ehtimolini yo‘q qilishni kafolatlaydi.
