Afg‘onistonda suv toshqini oqibatida 31 kishi qurbon bo‘ldi
41 kishi bedarak yo‘qoldi.
Afg‘onistonda kuchli yomg‘ir natijasida yuzaga kelgan suv toshqinlarida kamida 31 kishi halok bo‘ldi, 74 kishi jarohatlandi va 41 kishi bedarak yo‘qoldi. Bu haqda Afg‘onistonning «Ariana News» telekanali mintaqa rasmiylariga tayanib xabar berdi.
Hozirda Afg‘onistonning 17 ta provinsiyasida kuchli yomg‘ir natijasida suv toshqinlari yuzaga kelmoqda. Maʼlumotlarga ko‘ra, suv toshqinlari oqibatida 604 dan ortiq turar-joy va yuzlab gektar yer vayronaga aylangan. Bundan tashqari, 250 bosh chorva mollari nobud bo‘lgan.
Mintaqadagi ayrim yo‘llar, jumladan, Bomiyon shahrini Kobul bilan bog‘laydigan avtomagistral yo‘l yopilib qolgan.
