Belarus Ukraina g‘allasini o‘z hududi orqali o‘tkazishga rozi
Buning evaziga Minsk hech qanday shart qo‘ymagan.
Belarus Litva portlaridan keyingi eksport uchun Ukraina g‘allasini o‘z hududi orqali hech qanday shartlarsiz o‘tkazishga ruxsat beradi. Bu haqda BMT matbuot kotibi Stefan Dyujarrik maʼlum qildi.
Uning so‘zlariga ko‘ra, Belarus tashqi ishlar vaziri o‘rinbosari Yuriy Ambrazevich Nyu Yorkda BMT Bosh kotibi Antoniu Guterrish bilan uchrashgan. Muzokaralar chog‘ida belaruslik diplomat o‘z mamlakati “oldindan shartlarsiz Ukraina donining tranzitiga rozi bo‘lishini” aytgan.
Ambrazevich, shuningdek, hukumatning hozirda sanksiyalarga duchor bo‘lgan o‘z o‘g‘itlarini eksport qilish imkoniyatiga ega bo‘lish haqidagi iltimosini takrorlagan.
