Bayden Varshavada ukrainalik qochqinlar bilan uchrashdi
Prezidentning aytishicha, bolalar undan urush zonasidagi yaqinlari uchun ibodat qilishini so‘ragan.
AQSH prezidenti Jo Bayden Polshaga safari chog‘ida Varshavadagi “Milliy” stadionga tashrif buyurib, u yerda ukrainalik qochqinlar va ko‘ngillilar bilan uchrashdi.
Qochqin bolalar Baydenga “Dadam uchun, akam uchun va bobom uchun ibodat qiling, chunki ular u yerda jang qilmoqdalar”, deb murojaat qilgan. Prezidentning jurnalistlarga aytishicha, uning o‘zi ham urush zonasida yaqin insoni bo‘lish qanday ekanligini yaxshi biladi.
Shuningdek, uchrashuvda Bayden Rossiya Prezidenti haqidagi savolga ham javob berib, uni “qassob” deb atagan.
Avvalroq Bayden Polshada Ukraina vazirlari Dmitriy Kuleba va Oleksiy Reznikov bilan uchrashgani xabar qilingandi. Amerika prezidenti Rossiya bilan urush boshlanganidan beri Ukrainaning yuqori martabali vakillari bilan ilk uchrashuvini o‘tkazdi.
