Dushanba kuni NATOning yirik mashg‘ulotlariga start beriladi
Unda 30 ming harbiy ishtirok etishi kutilmoqda.
14 mart kuni Norvegiyada NATO harbiy mashg‘ulotlari bo‘lib o‘tadi.
Bu haqda BBC xabar berdi.
Cold Response-2022 o‘quv mashqlarida 27 davlatdan 30 ming harbiy, 200 samolyot va 50 ta kema ishtirok etadi. Ushbu mashg‘ulotlar Rossiyaning Ukrainadagi harbiy operatsiyasi boshlanishidan oldin rejalashtirilgan edi. Unda agressiyaga uchragan alyans aʼzosiga harbiy yordam ko‘rsatish ssenariysi ko‘rib chiqiladi
NATO qo‘shinlari Norvegiya dengizida, shuningdek, mamlakat shimoli va markazida harakat qiladi.
"Mashg‘ulotlar Norvegiya va uning ittifoqchilari xavfsizligi uchun o‘ta muhim. U Rossiyaning Ukrainaga hujumi ortidan tashkillashtirilmagan, ammo ushbu voqealar fonida alohida ahamiyatga ega",— degan Norvegiya mudofaa vaziri Rodjer Enoksen.
Eslatib o‘tamiz, avvalroq Bayden NATOning har bir dyum yeri qattiq himoya qilinishini maʼlum qilgandi.
