2021-yilda eng ko’p moliyaviy zarar keltirgan tabiiy ofatlar
Britaniyaning “Christian Aid” gumanitar tashkiloti ma’lumotlariga ko‘ra, 2021-yilda eng ko‘p moddiy zararga AQShdagi “Ida” to‘foni sabab bo‘lgan.
2021-yilda sodir boʻlgan eng yirik oʻnta tabiiy ofat moliyaviy jihatdan jami 170 milliard dollardan ortiq zarar keltirdi. Bu oʻtgan yilga nisbatan qariyb 20 milliard dollarga koʻp. Umumiy zarar miqdorining qariyb 13 foizga oshishi iqlimning antropogen o‘zgarishi oqibatlarini aks ettiradi, deya izoh berdi Britaniyaning Christian Aid gumanitar tashkiloti.
Ma’lumotlarga ko‘ra, avgust oyi oxirida, AQShdagi kuchli suv toshqiniga sabab bo‘lgan “Ida” to‘foni 2021-yilda eng katta moliyaviy ta’sir ko‘rsatgan tabiiy ofat sifatida qayd etildi. “Christian Aid” yetkazilgan zararni 65 milliard dollarga baholamoqda. Ikkinchi oʻrinda – iyul oyida Germaniya va Belgiyadagi suv toshqinlari, hukumatlar jami 43 milliard dollar zarar koʻrgan.
Ro‘yxatga AQShning Texas shtatidagi keskin sovuq harorat va Xitoyning Xenan provinsiyasidagi suv toshqini ham kiritilgan. Tashkilot bu ro‘yxatga asosan boy mamlakatlarda sodir bo‘lgan tabiiy ofatlarga asoslanganini qo’shimcha qildi.
Hisobotda aytilishicha, qashshoqroq mamlakatlarda infratuzilma sug'urtalanmaganligi sababli tabiiy ofatlardan ko'rilgan moliyaviy zararni hisoblash qiyin.
Eslatib o’tamiz, dekabr oyida Indoneziyada vulqonning otilishi oqibatida 13 kishi halok bo’lgan edi.
