Bo‘stonliqda noqonuniy chiqindixona yuzasidan tezkor tekshiruv o‘tkazildi
Hududda 24/7 kuzatuv kameralari o‘rnatish ishlari boshlandi.
Toshkent viloyatining Bo‘stonliq tumani “Yangi hayot” MFY hududida noqonuniy chiqindixona yuzaga kelgani aks etgan videomateriallar ijtimoiy tarmoqlarda tarqaldi.
Mazkur holat yuzasidan Chiqindilarni boshqarish va sirkulyar iqtisodiyotni rivojlantirish agentligi ishchi guruhi tomonidan hududga tezkor chiqilib, vaziyat atroflicha o‘rganildi.
O‘rganish natijalariga ko‘ra, chiqindilar yuridik va jismoniy shaxslar tomonidan belgilanmagan joylarga tashlangani sababli to‘planib qolgani aniqlangan. Hudud avval sanitar tozalash xizmatlarining reja-grafik ishlariga kiritilmagan bo‘lsa-da, Agentlik tomonidan zarur choralar ko‘rilgan.
Shuningdek, Agentlik huzuridagi kuzatuv va nazorat bo‘limi tomonidan hududga 24/7 rejimda ishlovchi zamonaviy kuzatuv kameralari o‘rnatish ishlari boshlab yuborildi. Ushbu texnik vositalar orqali noqonuniy chiqindi tashlash holatlarini aniqlash, oldini olish hamda qonunchilikka muvofiq choralar ko‘rish imkoniyati yaratiladi.
