O‘zbekistonda oliy toifali pedagoglarga uy-joy olish uchun ipoteka subsidiyasi ajratiladi

 

O‘zbekistonda oliy malaka toifasiga (bosh o‘qituvchi lavozimiga) ega hamda kamida 15 yil pedagogik ish stajiga ega bo‘lgan o‘qituvchilarni ijtimoiy qo‘llab-quvvatlash maqsadida uy-joy sotib olish uchun ipoteka krediti bo‘yicha subsidiya ajratish tartibi joriy etildi.

 

Vazirlar Mahkamasining 19-fevraldagi tegishli qaroriga muvofiq, mazkur toifadagi pedagoglarga ipoteka krediti bo‘yicha boshlang‘ich badalning 25 foizi davlat budjeti mablag‘lari hisobidan qoplab beriladi.

 

Subsidiyani olish uchun pedagoglar Davlat xizmatlari markazlari yoki Yagona interaktiv davlat xizmatlari portali orqali ariza topshirishlari mumkin. Arizalar elektron shaklda ko‘rib chiqiladi hamda talabgor haqidagi maʼlumotlar — fuqaroligi, pedagogik ish staji, oliy malaka toifasi, daromadlari va kredit tarixi — tegishli vazirlik va idoralar axborot tizimlari orqali avtomatik tarzda tekshiriladi. Bunda qo‘shimcha hujjatlar talab etilishiga yo‘l qo‘yilmaydi.

 

Ijtimoiy mezonlarga muvofiq deb topilgan talabgorlar bo‘yicha subsidiya ajratish yoki rad etish to‘g‘risida elektron xabarnoma yuboriladi. Shundan so‘ng pedagog ishtirok etuvchi tijorat bankini mustaqil tanlab, birlamchi uy-joy bozoridan ipoteka krediti asosida uy-joy xarid qilish imkoniyatiga ega bo‘ladi. Kredit ajratish masalasi bank tomonidan belgilangan tartibda ko‘rib chiqilib, keyinchalik notarial shartnoma rasmiylashtiriladi.

 

Qarorga ko‘ra, subsidiya bir oilaga (er yoki xotindan biriga) faqat bir marotaba beriladi va faqat birlamchi uy-joy bozoriga tatbiq etiladi. 2026 yilda ushbu yo‘nalish uchun davlat budjetidan 200 milliard so‘mgacha mablag‘ yo‘naltirilishi rejalashtirilgan.

 

Shuningdek, subsidiyalarni ajratish jarayoni maxsus elektron platformalar orqali shaffof, avtomatlashtirilgan va ochiq tartibda amalga oshiriladi.