Narkotik moddalar kontrabandasi bilan shug'ullangan shaxslar 15 yilga qamaldi
Ular 60 kilogrammga yaqin giyohvandlik vositalari bilan ushlangan.
Giyohvandlik vositalari kontrabandasi va noqonuniy savdosiga qarshi kurashish doirasida 2025-yil avgust oyida Davlat xavfsizlik xizmati Chegara qo‘shinlari hamda Surxondaryo viloyati bo‘yicha boshqarmasi, shuningdek viloyat Ichki ishlar boshqarmasi xodimlari hamkorligida Uzun tumanida tezkor tadbir o‘tkazildi. Bu haqda DXX Zamon.uz' ga xabar berdi.
Tadbir davomida 2005 va 2006-yillarda tug‘ilgan ikki nafar mahalliy fuqaro davlat chegarasini noqonuniy ravishda kesib o‘tib, Tojikiston Respublikasidan 20 kg 374 gr “opiy” hamda 41 kg 668 gr “gashish” moddalarini olib kelayotgan vaqtida ashyoviy dalillar bilan ushlangan.
Tezkor tadbirlar izchil davom ettirilib, mazkur shaxslarning jinoiy sheriklari – Uzun tumanida yashovchi 2000 va 2004-yillarda tug‘ilgan ikki nafar fuqaro hamda ushbu jinoyatning buyurtmachisi hisoblangan, Denov shahrida istiqomat qiluvchi 2000-yilda tug‘ilgan shaxs ham protsessual tartibda qo‘lga olingan.
Mazkur holat yuzasidan jinoyat ishi qo‘zg‘atilib, tergov harakatlari olib borilmoqda. Jinoyat ishlari bo‘yicha Uzun tuman sudining hukmiga ko‘ra, qonunbuzarlar O‘zbekiston Respublikasi Jinoyat kodeksining 223, 246 va 273-moddalari bilan aybli deb topildi.
Sud hukmiga muvofiq, ularning har biriga nisbatan 15 yil muddatga ozodlikdan mahrum qilish jazosi tayinlandi.
