Farg‘onada 9-sinf o'quvchisi profilaktika inspektorini pichoqladi

 

 

Bosh prokuratura matbuot kotibi Hayot Shamsutdinovning Zamon.uzga ma’lum qilishicha, joriy yil 18-fevral kuni soat 11:50 larda Qo‘qon shahar prokuraturasiga shahar IIB navbatchilik qismidan profilaktika inspektoriga tan jarohati yetkazilgani haqida xabar kelib tushgan.

 

Dastlabki ma’lumotlarga ko‘ra, Qo‘qon shahri “Sadoqat” MFY, Birlik ko‘chasida yashovchi, 2010-yilda tug‘ilgan voyaga yetmagan fuqaro o‘z yashash xonadoniga o'zining buvisi chaqiruviga asosan borgan profilaktika inspektori bilan oshxonada o‘zaro tortishib qolgan.

 

Aniqlanishicha, yuzaga kelgan kelishmovchilik davomida voyaga yetmagan shaxs profilaktika inspektori orqa tomoni bilan turgan holatdan foydalanib, stol ustida bo‘lgan oshxona pichog‘i bilan uning ko‘krak qafasining orqa chap qismiga bir marotaba zarba berib, tan jarohati yetkazgan.

 

Tibbiy muassasa tomonidan berilgan dastlabki xulosaga ko‘ra, jabrlanuvchiga “ko‘krak qafasining chap orqa sohasi sanchilgan-kesilgan, plevra bo‘shlig‘iga kirib borgan jarohat, chap tomonlama gemopnevmotoraks, tashqi va ichki qon ketish” tashxisi qo‘yilgan.

 

Mazkur holat yuzasidan 2026-yil 18-fevral kuni voyaga yetmagan shaxsga nisbatan O‘zbekiston Respublikasi Jinoyat kodeksining 104-moddasi 2-qismi “b” bandi bilan jinoyat ishi qo‘zg‘atilib, Jinoyat-protsessual kodeksining 221-moddasi tartibida ushlangan.