Toshkentda o'zbek yigit xorijlik fuqaroga nosvoy chektirmoqchi bo'ldi
Holat yuzasidan shaxsga nisbatan MJtK asosida ma’muriy bayonnoma tuzilib, qonuniy chora ko‘rish uchun sudga yuborildi.
Ijtimoiy tarmoqlarda chet el fuqarosiga nosvoy chekish taklif etilayotgan holat aks etgan video tarqalib, jamoatchilik muhokamasiga sabab bo‘ldi. Mazkur holat yuzasidan Toshkent shahar Ichki ishlar bosh boshqarmasi tomonidan tekshiruv o‘tkazilgan. Bu haqda Toshkent shahar IIBB matbuot xizmati xabar berdi.
Aniqlanishicha, joriy yilning 25-yanvar kuni Chilonzor tumanida joylashgan istirohat bog‘laridan birida 2006-yilda tug‘ilgan M.K. chet el fuqarosiga nosvoy chekishni taklif qilgan, shuningdek, uyatli so‘zlar bilan so‘kinib, jamiyatda yurish-turish qoidalarini qasddan buzgan.
Mazkur holat yuzasidan Chilonzor tumani IIO FMB tomonidan M.K. ga nisbatan Ma’muriy javobgarlik to‘g‘risidagi kodeksning 183-moddasi (“Mayda bezorilik”) bilan ma’muriy bayonnoma rasmiylashtirilgan. To‘plangan hujjatlar qonuniy chora ko‘rish uchun jinoyat ishlari bo‘yicha tuman sudiga yuborilgan.
