O‘zbekistonda sun’iy intellekt orqali shaxsiy ma’lumotlarni noqonuniy qayta ishlash uchun jarimalar joriy etildi
Shaxsiy ma’lumotlarni roziliksiz qayta ishlash 20,6 mln so‘mdan 41,2 mln so‘mgacha jarimaga sabab bo'ladi.
O‘zbekistonda sun’iy intellekt texnologiyalaridan foydalangan holda shaxsiy ma’lumotlarni noqonuniy qayta ishlash uchun javobgarlik belgilandi. Bu haqda Adliya vazirligi matbuot xizmati xabar berdi.
Yangi tartiblarga ko‘ra, fuqarolarning shaxsiy ma’lumotlarini ularning roziligisiz internet tarmog‘i, ommaviy axborot vositalari yoki telekommunikatsiya kanallari orqali qayta ishlash yoki tarqatish holatlariga yo‘l qo‘ygan shaxslarga nisbatan 20 million 600 ming so‘mdan 41 million 200 ming so‘mgacha jarima qo‘llaniladi. Shuningdek, huquqbuzarlik sodir etishda foydalanilgan texnik vositalar musodara qilinadi.
Qonunda inson huquqlari va erkinliklariga ta’sir ko‘rsatuvchi huquqiy ahamiyatga ega qarorlar faqat sun’iy intellekt tizimlarining xulosalari asosida qabul qilinishi mumkin emasligi qat’iy belgilandi.
Mazkur normalar shaxsiy ma’lumotlarni himoya qilish va sun’iy intellektdan mas’uliyatli foydalanishni ta’minlashga qaratilgan.
