Yuk mashinasi urib yuborgan o‘quvchi vafot etdi
Holat Qashqadaryoda sodir bo'lgan.
Qashqadaryo viloyati Ko‘kdala tumanida yuk mashinasi piyodalar yo‘lakchasidan o‘tayotgan o‘quvchini urib yubordi. Hodisa 2024 yil 15 may kuni sodir bo‘lgan.
Kamaz yuk mashinasi Samarqand-Gʻuzor avtomobil yo‘lidan harakatlanayotib Ko‘kdala tumanida joylashgan 37-maktab oldidagi piyodalar yo‘lakchasidan o‘tayotgan 2-sinf o‘quvchisini urib yuborgan. Oqibatda o‘quvchi og‘ir tan jarohatlari olib, hodisa joyida halok bo‘lgan.
Ijtimoiy tarmoqlarda hodisa tasvirlangan video tarqaldi. Bir guruh o‘quvchilar piyodalar yo‘lakchasidan o‘tmoqchi bo‘lishganda Neksiya to‘xtab ularga yo‘l beradi. Bolalar yo‘lakchadan o‘ta boshlaganda ikkinchi qatordan katta tezlikda kelgan yuk mashinasi ulardan birini urib ketadi.
Qayd etilishicha, hodisa yuzasidan Ko‘kdala tuman IIB tergov guruhi tomonidan Jinoyat kodeksining 266-moddasi 2-qismi bilan jinoyat ishi qo‘zg‘atilgan. Haydovchiga nisbatan qamoqqa olish tarzidagi ehtiyot chorasi qo‘llangan.
