“Quramax Medikal” MCHJ rahbari 20 yil ozodlikdan mahrum qilindi
Tayinlangan jazoni umumiy tartibli koloniyada o‘tash belgilandi.
Toshkent shahar sudida “Dok-1 maks ishi” bilan bog‘liq yakuniy sud majlisi davom etmoqda.
Sud majlisiga raislik qiluvchi Toshkent shahar sudining jinoyat ishlari bo‘yicha sudlov hay’ati sudyasi Muso Yusupov o‘qib eshittirgan sud qaroriga ko‘ra, “Quramax Medikal” mas’uliyati cheklangan jamiyati rahbari bo‘lib ishlagan hindistonlik S.R.P.ga uzil-kesil o‘tash uchun 20 yil muddatga ozodlikdan mahrum qilish jazosi tayinlandi. Tayinlangan jazoni umumiy tartibli koloniyada o‘tash belgilandi.
Eslatib o‘tamiz, mazkur ish doirasida 23 nafar mas’ul sud oldida javob berdi. Chunki, shu kabi shaxslarning mas’uliyatsizligi ortidan ushbu dori vositalarini iste’mol qilgan 86 nafar bola jabrlandi. Ulardan 68 nafari vafot etgan va 16 nafari og‘ir, 2 nafari yengil tan jarohati olgan.
