2024-yilda 1 mln gektar maydonga paxta ekiladi
Mavsum boshida 45,5 ming tonna chigit tozalangan.
O‘zbekistonda 2024-yil hosili uchun 1 million gektar maydonlarda g‘o‘za navlari ekish rejalashtirilgan.
Qayd etilishicha, ushbu g‘o‘za navlarini ekish uchun 50 ming tonna urug‘lik chigit talab etiladi. Gʻo‘za navlarining iqlim sharoitiga mos 22 ta ertapishar, 3 ta o‘rtapishar, 4 ta ingichka tolali hamda 24 istiqbolli va yangi navlarni ekish rejalashtirilgan.
Shuningdek, respublika bo‘yicha mavjud 46 ta urug‘lik chigit tayyorlash syexlari to‘liq ishlashi uchun barcha zaruriy choralar ko‘rilgan. Urug‘lik chigitlarni qadoqlash uchun yetarli miqdorda qop va yorliqlar, kimyoviy preparatlar zaxirasi yaratilgan.
Mavsum boshidan rejaga nisbatan 45,5 ming tonna yoki 81,3 foiz urug‘lik chigit tozalanib, saralangan va bu ishlar davom ettirilmoqda. Qolaversa, mavsum davomida hududiy boshqarma va tuman bo‘limi xodimlari tomonidan 188 ta nazorat tadbirlari olib borilib, aniqlangan kamchiliklar yuzasidan ogohlantirishlar berilishi ta’minlangan.
