Ekologiya vazirligi Buxoro va Surxondaryoda yo'l qurilishi sababli ko'p sonli daraxtlarning kesilishiga munosabat bildirdi
Vazirlik ma'lumotlariga ko'ra, hukumat hujjatlarida daraxtlarni kesish rejalashtirilmagan
Ijtimoiy tarmoqlarda Buxoro va Surxondaryo viloyatlarida qurilish ishlari munosabati bilan ko‘p sonli daraxt va butalarning kesilayotgani haqida xabar tarqaldi.
Ekologiya, atrof-muhitni muhofaza qilish va iqlim o’zgarishi vazirligining xabar berishicha, 6-iyul kuni Buxoro viloyati hokimligi A-380 avtomobil yo‘lining 150-228 km uzunlikdagi “G‘uzor-Buxoro-Nukus-Beyneu” qismini rekonstruksiya qilish loyihasini tasdiqlash uchun Ekologiya vazirligiga yuborgan. Loyihada 31 371 ta daraxt va butalarni yaqin atrofdagi bo'sh joylarga ko'chirib o'tkazish ko‘zda tutilgan.
Shuningdek, 7-iyul kuni Surxondaryo viloyati hokimligi tomonidan 4R-100 “Mangʻuzor-Jarqoʻrgʻon-Bandixon-Oltinsoy-Denov” avtomobil yoʻlining 128-174 km va 4R-105 “Darband-Boysun-Elbayon” avtomobil yoʻlining 5-70 km qismlarini rekonstruksiya qilish loyihasi yuzasidan 21 803 dona daraxtni belgilangan tartibda koʻchirib oʻtkazishda amaliy yordam soʻrab, vazirlikka murojaat qilingan.
"Ma’lumot uchun: Bosh vazir o‘rinbosari J. A. Xodjayev tomonidan imzolangan Hukumat komissiyasining 21-iyuldagi 58-son bayonnomasiga muvofiq, Ekologiya, atrof-muhitni muhofaza qilish va iqlim o‘zgarishi vazirligiga bir hafta muddatda daraxtlarni atrof-muhitga zarar yetkazmasdan ko'chirish bo'yicha Hukumat komissiyasiga xulosa berish va tegishli takliflar kiritish topshirilgan", — deyiladi vazirlik xabarida.
Vazirlikning qo'shimcha qilishicha, ushbu hujjatda daraxtlarni kesish haqida birorta ham so'z, shuningdek, bunday issiq mavsumda yashil maydonlar bilan biron bir chora ko'rish bo'yicha ko'rsatmalar yo'q.
