O‘zbekistonda jazoni o‘tab chiqqan shaxslarni ishga olganlarga subsidiya beriladi

 

Normativ-huquqiy hujjatlar loyihalari muhokamasi portaliga "Aholining ijtimoiy muhofazaga muhtoj ayrim toifalarini qo‘llab-quvvatlash va ularning bandligiga ko‘maklashish bo‘yicha qo‘shimcha chora-tadbirlar to‘g‘risida"gi qonun loyihasi joylashtirildi.

 

Unda qayd etilishicha, 2023-yil 1-noyabrdan 2025-yil 1-yanvarga qadar tadbirkorlik subyektlariga ishga qabul qilingan jazoni  ijro etish muassasalaridan ozod etilgan har bir shaxs uchun bazaviy hisoblash miqdorining 3 baravari miqdorida bir martalik subsidiya ajratish tartibi joriy etiladi.

 

Bunda subsidiya, ishga joylashtirilgan shaxs ish joyida kamida 3 oydan ortiq muddatda mehnat faoliyatini davom ettirgandan so‘ng to‘lanadi. Shuningdek, Ichki ishlar organlari tomonidan fuqaro jazoni ijro etish muassasalaridan ozod etilganligi to‘g‘risidagi maʼlumotni mehnat organlariga taqdim etib boriladi.

 

Jazoni ijro etish muassasalaridan ozod qilingan shaxslarni kasb-hunarga o‘qitish, ularga tadbirkorlik ko‘nikmalari va xorijiy tillarni o‘rgatish quyidagi tartibda amalga oshiriladi:

 

• kasb-hunar va tadbirkorlik ko‘nikmalarini o‘rgatishga oid maxsus o‘quv kurslari Kambag‘allikni qisqartirish va bandlik vazirligi tomonidan 2023-yil 1-noyabrdan boshlab "Ishga marhamat" monomarkazlari, kasb-hunarga o‘qitish markazlarida tashkil etiladi;

• xorijiy tillarni o‘rgatish huquq-tartibot organlarining oliy taʼlim muassasalarida Ichki ishlar vazirligi tomonidan  2023 yil 1 noyabrdan boshlab masofaviy taʼlim shaklida tashkil etiladi;

• Bunda, kasb-hunar, tadbirkorlik ko‘nikmalari va xorijiy tillarni o‘rgatish xarajatlari Kambag‘allikni qisqartirish va bandlik vazirligining tegishli jamg‘armalari mablag‘lari hisobidan moliyalashtiriladi.