Qozog'iston Rossiya gazini O'zbekistonga tranzit qilishga tayyorlanmoqda
Tranzit oktyabr oyidan boshlanishi rejalashtirilgan.
“QazaqGaz” boshqaruvi raisi Sanjar Jarkeshov Atirau viloyatiga ishchi safari chog‘ida mamlakat gaz uzatish tizimini modernizatsiya qilish bo‘yicha yangi loyihalar bilan tanishdi, deya xabar bermoqda “Kazinform” kompaniya matbuot xizmatiga tayanib.
Milliy kompaniya rahbari Rossiya gazini Qozog‘iston hududi orqali O‘zbekistonga tashish bo‘yicha “Markaziy Osiyo – Markaz” magistral gaz quvurining Qozog‘iston qismidagi tayyorgarlik ishlarining borishini ko‘zdan kechirdi.
Qayd etilishicha, barcha texnik tadbirlar “QazaqGaz” AJ tomonidan tasdiqlangan jadvalga muvofiq to‘liq hajmda amalga oshirilmoqda. Bugungi kunga qadar bir qator taʼmirlash-tiklash ishlari yakunlangan.
Ma 'lumot uchun, Rossiyadan O'zbekistonga joriy yilning 1-oktyabr sanasidan kuniga 9 million kubometr tabiiy gazni import qilish boshlanishi mo‘ljallanmoqda. Shunga ko‘ra, yillik hajm qariyb 2 milliard 800 million kubometrni tashkil etadi.
