Qarshida agentlik rahbari xodimini jag‘ini sindirgani aytilmoqda
Holat yuzasidan Yoshlar ishlari agentligi viloyat boshqarmasi izoh berdi.
Maʼlum bo‘lishicha, xodimning jag‘ qismidan jarrohlik amaliyoti amalga oshirilgan. Shu tufayli u voqeani so‘zlab berolmadi. Ammo uning onasi holatni tushuntirishga urindi. Unga ko‘ra, rahbar topshiriqlarni so‘ragan. O‘g‘li bajarganini aytib, telefonida ko‘rsatayotgan vaqtida boshlig‘i jag‘iga urgan, deyiladi Millar dasturiga efirga uzatilgan surishtiruvda.
“Jag‘ suyagi yorilib ketgan. Bu insonning bolasimi? O‘g‘limning ahvoli hozir qoniqarli. Ertalab soat 10:00 larda jag‘ini tikdik. Hozir ochilmaydi, gapirolmaydi. Og‘ziga suv tomizib o‘tiribmiz”, — deydi xodimning onasi.
Yoshlar ishlari agentligi viloyat boshqarmasi boshlig‘i holat bo‘yicha izoh berdi:
"Yig‘ilish vaqtida rahbar va xodim o‘rtasida o‘zaro hurmatsizlik bo‘lgan. Rahbarga nisbatan xodim hurmatsizlik qilgan. Yig‘ilishdan so‘ng xonada ularning ikkisi qolgan, shu sababli holat bo‘yicha aniq maʼlumot yo‘q", — deydi u.
