Ohangaronda qora tutun sabab 6 ta mashina YTHga uchradi
YHXB hodisa tafsilotlarini ochiqladi.
Bugun, 23 iyun kuni Toshkent viloyatining Ohangaron tumanida oltita mashina ishtirokida yo‘l-transport hodisasi sodir bo‘ldi. Holat yuzasidan viloyat IIBB YHXB maʼlumot berdi.
Qayd etilishicha, hodisa soat 13:00 larda Ohangaron tumani hududidan o‘tgan Olmalik-Toshkent avtomobil yo‘lining 13-kilometrida yuz bergan. Unda Captiva, Lada Largus, Nexia–3, Shinerfly (mikro avtobus), Damas hamda Howo rusumli avtomashinalar bir yo‘nalishda harakatlanib kelayotgan vaqtlarida oldinma-ketin urilib ketgan.
YTH oqibatida Nexia–3 rusumli transport vositasi yo‘lovchisi — 1980 yilda tug‘ilgan T.G.ga birinchi tibbiy yordam ko‘rsatilgan. Boshqa harakat ishtirokchilarining sog‘lig‘iga ziyon yetmagan. Transport vositalari texnik shikastlangan.
Dastlabki surishtiruvlarga ko‘ra, dala maydonida sodir bo‘lgan yong‘indan hosil bo‘lgan qora tutun haydovchilarni boshqa avtoulovlarni ko‘rmay qolishiga sabab bo‘lgan.
Holat yuzasidan tumani IIB YHXB tomonidan surishtiruv ishlari olib borilmoqda.
