Iste’molchilarga suv yetkazib berish bosqichma-bosqich davlat-xususiy sheriklikka o‘tkaziladi

 

Prezident farmoni bilan Suv xo‘jaligi vazirligi faoliyatining ustuvor yo‘nalishlari tasdiqlandi.

 

Hujjatga ko‘ra, 2030-yil yakunigacha vazirlikning quyi (tuman) bo‘g‘inda suv resurslarini boshqarish, fermer xo‘jaliklari va boshqa suv isteʼmolchilariga suv yetkazib berish hamda suvning hisobini yuritish funksiyasi bosqichma-bosqich davlat-xususiy sheriklikka o‘tkaziladi. Shunga ko‘ra, respublikadagi barcha tumanlarda 2023-yil sentyabrgacha suv resurslarini boshqarishni davlat-xususiy sheriklikka o‘tkazish bo‘yicha chora-tadbirlar ishlab chiqiladi.

 

Farmon bilan Suv xo‘jaligi obyektlari xavfsizligini nazorat qilish inspeksiyasi Suv xo‘jaligi vazirligi huzuridagi Suv xo‘jaligi obyektlari xavfsizligini va suvdan foydalanishni nazorat qilish inspeksiyasi etib qayta nomlandi.

 

Qayd etilishicha, inspeksiya 2023-yil 1-avgustdan suvdan foydalanish va suv isteʼmoli tartibiga rioya etilishi hamda suvni tejaydigan sug‘orish texnologiyalaridan samarali foydalanilishi bo‘yicha o‘tkaziladigan tekshiruvlarni «Yagona davlat nazorati» axborot tizimida ro‘yxatdan o‘tkazmasdan amalga oshiradi.

 

Inspeksiya yer usti suvlaridan foydalanish va suv isteʼmoli qoidalarini hamda suv olish tartibini buzish holatlari bo‘yicha maʼmuriy huquqbuzarliklar to‘g‘risidagi ishlarni ko‘rib chiqish, shuningdek, jismoniy shaxslarga nisbatan maʼmuriy jazo qo‘llashi mumkin.

 

Bundan tashqari, 2025-yil 1-yanvargacha «Raqamli suv xo‘jaligi» yagona axborot tizimi yaratilib, suv xo‘jaligi bo‘yicha barcha dasturiy taʼminotlar mazkur tizimga bosqichma-bosqich integrasiya qilinadi.