Farg‘onada tirik mushukni yoqib yuborganlar qamaldi

 

Farg‘onada mushukni tirik holda yoqib yuborgan uch nafar shaxsga nisbatan ichki ishlar organlari tomonidan Maʼmuriy javobgarlik to‘g‘risidagi Kodeksning 111-moddasi bilan bazaviy hisoblash miqdorining 3 baravari miqdorida jarima jazosi tayinlash to‘g‘risida qaror qabul qilingan edi.

 

Quvasoy shahar prokurorining arizasi bilan yuqoridagi qaror bekor qilinib, huquqbuzarlarga nisbatan Maʼmuriy javobgarlik to‘g‘risidagi kodeksining 111-moddasi (hayvonlarga nisbatan shafqatsiz munosabatda bo‘lish) 2-qismi va 189-1-moddasi (tazyiqni, zo‘ravonlikni yoki shafqatsizlikni targ‘ib qiluvchi mahsulotni tayyorlash, olib kirish, tarqatish, reklama qilish, namoyish etish) bilan rasmiylashtirilgan maʼmuriy bayonnoma mazmunan ko‘rib chiqish uchun jinoyat ishlari bo‘yicha Quvasoy shahar sudiga yuborilgan. 

 

Sud majlisida M. A. (1983-yilda tug‘ilgan), Az. A. (1995-yilda tug‘ilgan) va As. A. (2005-yilda tug‘ilgan) ga oid maʼmuriy huquqbuzarlik to‘g‘risidagi ish ko‘rib chiqildi. 

 

Jinoyat ishlari bo‘yicha Quvasoy shahar sudining qaroriga ko‘ra M. A. Maʼmuriy javobgarlik to‘g‘risidagi kodeksining 111-moddasi 2-qismi va 189-1-moddasida nazarda tutilgan huquqbuzarliklarni sodir qilgan deb topilib, unga ushbu kodeksning 34-moddasi (bir necha huquqbuzarlikni sodir etganlik uchun maʼmuriy jazo qo‘llanish) ga asosan 7 sutka maʼmuriy qamoq jazosi tayinlandi.

 

Shuningdek, Az. A. Maʼmuriy javobgarlik to‘g‘risidagi kodeksining 111-moddasi 2-qismida nazarda tutilgan huquqbuzarlikni sodir qilgan deb topilib, unga 5 sutka maʼmuriy qamoq jazosi hamda As. A. Maʼmuriy javobgarlik to‘g‘risidagi kodeksining 111-moddasi 2-qismida nazarda tutilgan huquqbuzarlikni sodir qilgan deb topilib, unga 3 sutka maʼmuriy qamoq jazosi tayinlandi.