Endi kiyim-kechak tayyorlashda bayroq tasviridan foydalanish mumkin

 

Bayroq tasviri tushirilgan belgilardan kiyim-kechak, sport kiyimlarini tayyorlashda foydalanishga ruxsat berilishi mumkin. Bu haqda “O’zA” axborot agentligi xabar qildi.

 

Avvalroq “O‘zbekiston Respublikasining Davlat bayrog‘i to‘g‘risida”gi Qonuniga o‘zgartirish va qo‘shimchalar kiritish haqida”gi qonun loyihasi jamoatchilik muhokamasiga qo‘yilgandi. Ushbu hujjat bilan fuqarolarning Davlat bayrog‘idan foydalanish imkoniyatini yanada kengaytirish maqsadida amaldagi Qonunga bir necha o‘zgartirish va qo‘shimchalar kiritilishi taklif etilmoqda.

 

Jumladan, davlat bayrog‘idan sport musobaqalarida, ommaviy jismoniy tarbiya tadbirlarida, madaniy va o‘zga ommaviy tadbirlarda, oilaviy bayramlarda, xotiraviy sanalarni bayram qilishda hamda boshqa hollarda ham bayroqqa nisbatan zarur hurmatni ta’minlagan holda foydalanilishga ruxsat berish nazarda tutilmoqda. 

 

Shuningdek, davlat ramziga zarur hurmat bilan muomala qilgan holda undan va uning tasviri tushirilgan belgilardan jamoat joylari va binolarda, yashash yoki ish joylarida hamda ularga tutash bo‘lgan hududlarda, transport vositalarining salonida foydalanish mumkinligini belgilash ko‘zda tutilmoqda. 

 

Taklif etilayotgan qonun loyihasi bilan O‘zbekiston Respublikasiga tegishlilik belgisi sifatida Davlat bayrog‘i va uning tasviri tushirilgan belgilardan O‘zbekiston Respublikasi vakili bo‘lgan jismoniy va yuridik shaxslar tomonidan rasmiy xalqaro tadbirlarda foydalanishda, harbiy yoki boshqa davlat xizmatida bo‘lgan shaxslar tomonidan kiyim-kechak va farqlovchi nishonlarda qo‘llashda, xalqaro sport musobaqalari hamda O‘zbekiston chempionatlari uchun sport kiyimlarini tayyorlashda foydalanishga ruxsat berilyapti. Qolaversa, Davlat bayrog‘iga nisbatan hurmatsizlik bilan munosabatda bo‘linishiga yo‘l qo‘yilmaydigan hollar aniq belgilab berilmoqda.

 

Mazkur qonun loyihasi Oliy Majlis Qonunchilik palatasidagi O‘zLiDeP fraksiyasining navbatdagi yig‘ilishida qizg‘in muhokama qilindi. Deputatlar qonun loyihasining g‘oyatda muhimligi va zarurligini aytib, uning qabul qilinishi orqali fuqarolar undan o‘z xonadonlarida, ish joylarida erkin foydalanishi mumkinligini, jamiyatda mamlakatga nisbatan mehr-muhabbat tuyg‘ularini va vatanparvarlik hissini yanada oshirishga xizmat qilishini ta’kidladi.

 

Shuningdek, yig‘ilishda yana boshqa qonun loyihalari ham muhokama qilinib, deputatlar tomonidan ma’qullandi.