Xitoylik jurnalist “Oltin qalam” oldi
Unga O‘zbekiston elchixonasida mukofot topshirilgan.
O‘zbekistonning Pekindagi elchixonasida shu yil o‘tkazilgan “Oltin qalam” XVII milliy mukofoti uchun xalqaro tanlovning “Chet ellik jurnalistning O‘zbekiston haqidagi eng yaxshi materiali uchun” nominatsiyasida birinchi o‘ringa sazovor bo‘lgan Xitoyning “Jenmin xuabao” nashriyoti muharriri San Xaoyangga mukofot statuetkasi, diplomi hamda pul mukofoti tantanali ravishda topshirildi. Bu haqda “Dunyo” axborot agentligi xabar bermoqda.
Marosimda so‘z olgan O‘zbekiston jurnalistlar uyushmasi raisi vazifasini bajaruvchi Xolmurod Salimov bu yilgi tanlov davlat rahbari Shavkat Mirziyoyevning 2022 yil 27 iyundagi “Ommaviy axborot vositalarini qo‘llab-quvvatlash va jurnalistika sohasini rivojlantirish chora-tadbirlari to‘g‘risida”gi qarori ijrosi doirasida demokratik tamoyillar asosida yana-da ochiq va shaffof tashkil etilgani, unda dunyoning 25 davlatidan 50 nafardan ziyod xorijlik jurnalistlar qatnashganini alohida taʼkidladi. Shuningdek, mamlakatda barcha sohalarda amalga oshirilayotgan keng ko‘lamli islohotlar haqida ham atroflicha maʼlumotlar taqdim etildi.
Tadbirda ikki mamlakat ommaviy axborot vositalari o‘rtasida o‘zaro hamkorlikni rivojlantirish, tajriba almashishni taʼminlash kabi masalalar xususida fikr yuritildi.
“Keyingi yillarda O‘zbekistonda jadal olib borilayotgan islohotlar bilan tanishish barobarida ularni Xitoy ommaviy axborot vositalarida yoritilishiga ham hissa qo‘shib kelmoqdaman. Har qanday inson muvaffaqiyatga erishsa, quvongani singari yuqori nufuzli “Oltin qalam” xalqaro tanlovida g‘olib bo‘lganimdan behad mamnun bo‘ldim. Bundan keyin ham O‘zbekiston haqida turli mavzularga bag‘ishlangan materiallar tayyorlashni o‘z oldimga maqsad qilib qo‘yganman”, — dedi San Xaoyang.
