Farg‘onada psixotrop dori sotayotganlar ushlandi
Bu bo‘yicha viloyatda tezkor tadbir o‘tkazilgan.
Tarkibida kuchli taʼsir qiluvchi moddalari bo‘lgan dori vositalarining muomalaga kiritilishining oldi olindi, deya xabar bermoqda Bosh prokuratura huzuridagi Iqtisodiy jinoyatlarga qarshi kurashish departamenti.
Departamentning Marg‘ilon shahar bo‘limi tomonidan DXX xodimlari bilan hamkorlikda o‘tkazilgan tezkor tadbirlarda fuqaro R.S. tarkibida psixotrop moddalar bo‘lgan 588 dona dori vositalarini fuqaro A.A.ga 2 950 AQSH dollariga, fuqaro m.m. kuchli taʼsir qiluvchi 3 348 dona dori vositasini fuqaro m.A.ga 6,1 mln so‘mga sotgan vaqtlarida ashyoviy dalillar bilan ushlanganlar.
Departamentning Bag‘dod tumani bo‘limi tomonidan o‘tkazilgan tezkor tadbirda “Sh.I.” XKga qarashli dorixona rahbari Sh.Yu. tarkibida kuchli taʼsir qiluvchi moddalar bo‘lgan 130 dona dori vositasini o‘tkazgan vaqtida ashyoviy dalillar ushlangan.
Mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergovga tegishliligi bo‘yicha yuborilgan.
