Surxondaryolik tadbirkor 40 ta ehtiyojmand oilada uy sovg‘a qildi
Ushbu uylar 5 qavatli bo‘lib, 2 va 3 xonali kvartiralardan iborat.
Surxondaryo viloyatining Sherobod tumanida ehtiyojmand xotin-qizlar, kam taʼminlangan va nogironligi bor oilalar uchun 40 ta xonadonga mo‘ljallangan ikkita besh qavatli uy foydalanishga topshirildi.
Tumanning Taroqli mahallasida qad rostlagan ushbu ikkita ko‘p qavatli uyni mahalliy tadbirkor o‘z hisobidan bunyod etib, muborak Ramazon hayiti kuni uy-joyga muhtoj 40 ta oilaga hadya qilgan. Quruvchilar uy sovg‘a qilgan tadbirkor nomini ochiqlamaslikni so‘rashgan.
Ikkita ko‘p qavatli uydagi xonadonlar ikki va uch xonali bo‘lib, ularning har biri yuksak did bilan zamonaviy usulda jihozlangan. Yangi uyning egalari shundoqqina kirib yashashlari uchun barcha sharoit yaratilgan.
Maʼlum qilinishicha, tadbirkor o‘tgan yili ham tumandagi 27 ta kam taʼminlangan uy-joyga muhtoj oilaga kottej uy qurib bergan.
