Namanganda uy yonib ketdi
FVB hodisa tafsilotlarini maʼlum qildi.
Bugun, 13 fevral kuni Namangan shahridagi xonadonlarning birida yong‘in sodir bo‘ldi. Holat yuzasidan viloyat Favqulodda vaziyatlar boshqarmasi maʼlumot berdi.
Qayd etilishicha, soat 16:16 da Namangan shahrining “Qadamjo” MFY hududida joylashgan 6-uyda yong‘in yuz bergan. Oqibatda yashash uyining shift va tom qismining 40 kvadrat metr maydoni yonib zararlangan.
Yong‘in-qutqaruv ekipaji soat 16:26 da voqea joyiga yetib borib, yong‘in soat 16:28 da qurshab olingan va soat 16:45 da bartaraf etilgan. Uyning 150 kvadrat metr maydoni saqlab qolingan.
Hodisa oqibatida tan jarohati olgan va halok bo‘lganlar yo‘q. Hozirda yong‘in sababi va moddiy zarar miqdori aniqlanmoqda.
