Bolalarni maktabgacha taʼlim bilan qamrab olish darajasi 80 foizga yetkaziladi — Prezident
Shavkat Mirziyoyev Kichik yoshdagi bolalarni tarbiyalash va taʼlim berish bo‘yicha ikkinchi Butunjahon konferensiyasida bir nechta takliflarni ilgari surdi.
Quyidagi muhim takliflar ilgari surildi:
Kichik yoshdagi bolalar uchun sifatli taʼlim berish muammolarini global darajada samarali hal qilish, bu masalalarga birgalikda tezkor yechimlar va tizimli yondashuvlarni ishlab chiqish juda dolzarbdir. Buni inobatga olib, mazkur xalqaro konferensiyani muntazam ravishda o‘tkazib borish;
BMTning Barqaror rivojlanish maqsadlariga uyg‘un bo‘lgan taʼlim bo‘yicha barcha saʼy-harakatlarimini tizimli muvofiqlashtirish maqsadida Toshkentda YUNESKOning mintaqaviy markazini tashkil etish ;
Kichik yoshdagi bolalar taʼlimi yo‘nalishida jahonda to‘plangan ilg‘or tajribalar, zamonaviy interaktiv o‘qitish uslublari, amaliy bilim va ko‘nikmalar bilan o‘zaro almashish maqsadida tarbiyachilar xalqaro hamjamiyatini tashkil etish.
"2024-yilda BMT tomonidan o‘tkaziladigan kelajak sammitining umumiy kun tartibidagi asosiy mavzulardan biri sifatida, kichik yoshdagi bolalarni tarbiyalash va taʼlim berish masalasini kiritish hamda unga alohida sessiyani bag‘ishlash muhimdir.
Bugungi konferensiya yakunlari bo‘yicha BMT Bosh Assambleyasining bolalar tarbiyasi masalalari umumbashariy taraqqiyotga erishishning muhim omili ekani to‘g‘risida maxsus rezolyutsiyasini qabul qilish ayni muddao bo‘lar edi", — dedi davlat rahbari.
