Hamshiralarning ish haqi oshiriladi

 

Bugun, 26 oktyabr kuni Prezident Shavkat Mirziyoyev Toshkent shahridagi tibbiyot muassasalari faoliyati bilan tanishadi hamda sog‘liqni saqlash tizimida amalga oshirilayotgan ishlar va kelgusidagi ustuvor vazifalarga bag‘ishlangan videoselektor yig‘ilishi o‘tkazdi.

 

Davlat rahbari yig‘ilish davomida hamshiralarni tayyorlash masalasiga e’tiborni oshirish lozimligini aytib o‘tdi.

 

“Jarrohlik amaliyoti o‘tkaziladi, hammasiga vrach javob beradi. Ammo operatsiyadan so‘ng bemorga kim qaraydi? Hamshira, albatta! Ammo biz uni qayerda o‘qityapmiz, unga nimalarni o‘rgatyapmiz?

 

Hamshiralarning malakasini oshirish masalasiga katta e’tibor qaratishimiz kerak. Hamshiralar uchun malaka oshirish vaqti bir oydan uch oygacha bo‘lishi va ularga jahon tajribasidagi barcha yutuqlar o‘rgatilishi kerak.

 

Katta shifokorlar o‘z yutug‘ini malakali hamshiralar bilan bog‘laydi. Hamshirani tanqid qilishdan oldin uni yetarlicha o‘qitishimiz kerak, sharoit va imkoniyat yaratib berish lozim.

 

Qaysi viloyat hokimi birorta hamshirani uy bilan ta’minladi? Hech biri? Ular uchun ipoteka imkoniyatlarini o‘ylab ko‘rish vaqti keldi.

 

Xozircha biz hamshiralarga adolatli maosh bera olganimizcha yo‘q. Tegishli mutasaddilar bu bo‘yicha o‘z takliflarini berishlari kerak”, — dedi Shavkat Mirziyoyev.

 

Vazirlar Mahkamasiga hamshiralarni o‘qitish va malakasini oshirish, mehnatiga haq to‘lash miqdorini oshirish, umuman, ular uchun munosib mehnat va turmush sharoitlarini yaratish masalalarini o‘z ichiga olgan qaror loyihasini tayyorlashga topshiriq berildi.