Samarqandda xalqaro gastronomik festival boshlandi

 

Samarqand shahridagi Islom Karimov ko‘chasida Turizm va madaniy meros vazirligi, Samarqand viloyati hokimligi tomonidan xalqaro gastronomik festival o‘tkazilmoqda. Unda Rossiya, Saudiya Arabistoni, Ozarbayjon, Qirg‘iziston va boshqa davlatlarning mohir oshpazlari, shuningdek, O‘zbekistonning har bir viloyatidan pazandalar jamoalari, chet ellik sayyohlarga xizmat ko‘rsatuvchi umumiy ovqatlanish korxonalari vakillari qatnashmoqda.

 

Mamlakatning gastronomik salohiyatini keng targ‘ib qilish, turizmning ushbu yo‘nalishida xalqaro hamkorlikni rivojlantirish, milliy pazandalik anʼanalarini ommalashtirish orqali sayyohlar oqimini ko‘paytirish festivalning asosiy maqsadi hisoblanadi.

 

"Andijon viloyatining Shahrixon tumanidagi "G‘ofur ota" choyxonasida faoliyat yuritaman, – deydi oshpaz Anvarjon Qurbonov. – Festivalda o‘n yildan buyon viloyatimizning brend taomiga aylangan "Piramida osh"ni tayyorlayapmiz. Bu oshimiz o‘ziga xos dizayni bilan ajralib turadi. Shuningdek, oshni tayyorlash jarayonining o‘zida sabzi to‘g‘raladi. Chunki, oldin to‘g‘ralgan sabzi biroz sifatini yo‘qotadi. Shu bois, oshimizga solinadigan har bir mahsulot shu yerning o‘zida tayyorlanmoqda. Mazasiga hakamlar, qolaversa festivalga kelgan aholi, turistlar baho berishadi." 

 

Ayni paytda ishtirokchilar taom tayyorlash jarayoni bilan band.

 

Festivalda tayyorlangan taomlarni xalqaro oshpazlik hakamlari baholab boradi. G‘olib oshpazlar munosib taqdirlanadi. 

 

Festival doirasida dunyoning taniqli oshpazlari tomonidan mahorat saboqlari o‘tkaziladi.