Yakkabog‘da nomutaxassis kadr direktorlikka qo‘yilgani aytildi
Holat yuzasidan viloyat XTB munosabat bildirdi.
Ijtimoiy tarmoqlarda Qashqadaryo viloyatining Yakkabog‘ tumanidagi 103-sonli umumiy o‘rta ta’lim maktabida mutaxassis bo‘lmagan kadr direktorlikka tayinlangani haqida xabarlar tarqaldi. Holat yuzasidan viloyat Xalq ta’limi boshqarmasi rasmiy munosabat bildirdi.
Ma’lum bo‘lishicha, 103-umumiy o‘rta ta’lim maktabi direktorligi lavozimi vakant bo‘lganligi uchun 2021-yil 6-noyabrda Davlat xizmatlarini rivojlantirish agentligining Vacancy.argos.uz saytiga ochiq tanlovga e’longa berilgan. Ushbu lavozimga 7 nafar nomzod ariza topshirgan.
Shundan so‘ng 4 nafar nomzodning malaka talablari mos kelgan va ikkinchi bosqichga o‘tgan. 2022-yil 1-fevral kungi test sinovlarida 2 nafar nomzod ishtirok etgan, ikki nafari esa qatnashmagan. Unda nomzod J.L. 27,5 ball, A.B. 67,5 ball to‘plagan.
Xalq ta’limi vazirligi hamda O‘zbekiston Respublikasi Prezidenti huzuridagi Davlat xizmatlarini rivojlantirish agentligining qo‘shma qarorida “nomzodlarning test savollari umumiy ko‘rsatkichining kamida 55 foiziga teng ball to‘plashi imtihon natijalarini ijobiy deb topish uchun asos bo‘ladi”, deya ko‘rsatilgan.
A.B. 1989-yili Yakkabog‘ tumanida tug‘ilgan. 2014-yilda Toshkent axborot texnologiyalari universitetini tamomlagan. 2014–2016-yillarda Yakkabog‘ tumani Agrobiznes kollejida amaliyotchi o‘qituvchisi, ishlab chiqarish ta’lim ustasi, 2016–2018-yillarda xo‘jalik ishlari bo‘yicha direktor o‘rinbosari lavozimlarida ishlagan.
A.B. nomzodi malaka talablariga mos kelganligi hamda test sinovlaridan ijobiy o‘tganligini inobatga olib, viloyat xalq ta’limi boshqarmasining 2022-yil 24-fevraldagi xati bilan uning nomzodi Xalq deputatlari Yakkabog‘ tumani Kengashiga ko‘rib chiqish uchun yuborilgan.
Xalq depututlari Kengashining 2022-yil 31-maydagi Qarori bilan A.B.103-umumiy o‘rta ta’lim maktabi direktorlik lavozimiga tavsiya etilgan. Kengash qaroriga asosan viloyat xalq ta’limi boshqarmasi boshlig‘ining 2022-yil 27-iyundagi buyrug‘i bilan A.B. maktabga direktor etib tayinlangan.
