O‘zbekistonda necha kishi Prezidentning vakolat muddatini uzaytirish yuzasidan taklif bergani ochiqlandi
Ma’lum qilinishicha, bu bo‘yicha komissiyaga 3 ming 29 ta taklif kelib tushgan.
O‘zbekiston Konstitutsiyasining 90-moddasiga kelib tushgan takliflarning 3 ming 29 tasi prezidentning saylanish muddatini 7 yoki undan ko‘p muddatga o‘zgartirish bilan bog‘liq. Bu haqda Konstitutsiyaviy komissiya matbuot kotibi Odiljon Tojiyev ma’lum qildi.
Qayd etilishicha, komissiyaga kelib tushgan jami takliflarni tahlil qilganda, eng ko‘p o‘zgartirish taklif qilingan bo‘limlar ikkinchi, uchinchi va beshinchi bo‘limlardir. Birgina beshinchi bo‘limga o‘zgartish va qo‘shimchalar kiritish bo‘yicha jami 6 ming 302 ta taklif kelib tushgan.
Shuningdek, Konstitutsiyaning 41-moddasiga kelib tushgan 1 ming 658 ta takliflarning aksariyati “o‘qituvchi va pedagoglarning yuksak maqomini belgilash, uning ishlariga aralashuv cheklanishi”ga doir normani kiritishga oiddir.
