Samarqanddagi avtohalokatda 4 yoshli qiz vafot etdi
Hodisadan so‘ng haydovchi bolani shifoxonaga joylashtirib, voqea joyidan qochib ketgan.
Samarqand viloyatining Oqdaryo tumanida o‘lim bilan bog‘liq yo‘l-transport hodisasi sodir bo‘ldi. Bu haqda viloyat IIB axborot xizmati ma’lum qildi.
Xabarda aytilishicha, voqea joriy yilning 31 may kuni sodir bo‘lgan. 15 hamda 4 yoshli qizaloqlar tumanning Kumushkent mahallasi hududidagi piyodalar o‘tish joyidan yo‘lni kesib o‘tayotganda katta tezlikda harakatdanib kelgan Neksiya avtomashinasi 4 yoshli qizchani urib yuborgan.
Hodisa oqibatida qiz og‘ir tan jarohatlari bilan tuman tibbiyot birlashmasiga yotqizilgan va shu yerda vafot etgan. Qoidabuzar haydovchi qizlarni shifoxonada qoldirib, o‘zi esa qochib ketgan.
Samarqand viloyati IIB YHXB xodimlarining tezkor qidiruv-surishtiruv ishlari natijasida mazkur yo‘l-transport hodisasini sodir etgan etgan haydovchi topilgan. Hozirda u bilan tergov harakatlari olib borilmoqda.
“O‘zimni umuman yo‘qotib qo‘ydim. Keyin birdan qo‘rqib mashinaga o‘tirdim-da ketdim”, — deydi 27 yoshli haydovchi.
Marhumaning onasining aytishicha, qizcha bog‘chaga chiqaman deb, opasiga qo‘shilib ketgan. 15-20 minut o‘tib, uning avtohalokatga uchraganini haqida xabar yetib kelgan.
Eslatib o‘tamiz, bundan oldin Samarqand shahrining Firdavsiy ko‘chasida Neksiya haydovchisi yo‘lni kesib o‘tayotgan piyodani urib yuborgandi. Oqibatda fuqaro tan jarohatlari bilan shifoxonaga yotqizilgan.
Javohirbek TURSUNOV
