Isroilga kirish uchun yangi qoidalar joriy qilindi
Endi ushbu mamlakatga boruvchilar Isroil Sog‘liqni saqlash vazirligidan ruxsatnoma olishi kerak.
Isroilga kirishda koronavirus bilan bog‘liq yangi qoidalar joriy qilindi. Bu haqda “Uzbekistan airways” matbuot xizmati xabar bermoqda.
Qayd etilishicha, Isroilga parvoz qilishdan oldin yo‘lovchilar “Kirish hisoboti” shaklini to‘ldirish va Isroil Sog‘liqni saqlash vazirligidan elektron ruxsatnoma va bortga chiqishdan oldin taqdim etilishi kerak bo‘lgan Green Pass’ni olishlari kerak. “Kirish hisoboti”ning amal qilish muddati 48 soat.
Isroildan tashqarida 72 soatdan ortiq vaqt davomida bo‘lgan yo‘lovchilar salbiy PZR-testini taqdim etishlari kerak. PZR-testi ingliz tilida bo‘lishi kerak va yo‘lovchi ro‘yxatdan o‘tish paytida taqdim etadigan pasportning raqamini o‘z ichiga olishi kerak.
