Ichki valyuta bozorida Etika kodeksi qabul qilindi

 

Etika kodeksi ichki valyuta bozorida valyuta oldi-sotdi operasiyalarining amalga oshirilishini yanada takomillashtirish, jumladan, bozor ishtirokchilari tomonidan yuqori standartlarga asoslangan bozor faoliyatini tashkil etish maqsadida O‘zbekiston Respublikasi Markaziy banki va tijorat banklari tomonidan ishlab chiqilgan. Bu haqda Markaziy bank matbuot xizmati ma’lum qildi.

 

Unda kodeks ichki valyuta bozori ishtirokchilarining barqaror faoliyat ko‘rsatishiga asos bo‘lib, barcha manfaatdor tomonlarning qonuniy huquq va manfaatlarini hisobga olgan holda halol va xolis faoliyat yuritishlari uchun shakllangan umumaxloq normalari jamlanmasi hisoblanadi.

 

Mazkur kodeks ichki valyuta bozorining yaxlitligi va samaradorligini ta’minlash hamda takomillashtirishga qaratilgan bo‘lib, qonunchilik hujjatlarida to‘g‘ridan-to‘g‘ri ko‘zda tutilmagan masalalarni tartibga solish bo‘yicha tavsiyaviy xarakterga ega.

 

Kodeks ichki valyuta bozorida quyidagi asosiy tamoyillarni o‘z ichiga oladi.

 

Professionalizm − ichki valyuta bozorida faoliyat olib boruvchi mas’ul xodimlarning professional darajada tegishli tajriba, texnik bilim, malaka va ko‘nikmalarga ega bo‘lishi kerak.

 

Ma’lumotlar konfidensialligi − bozor ishtirokchilari tomonidan o‘z mijozlariga xizmat ko‘rsatish jarayonida olgan konfidensial ma’lumotlarni saqlash, himoya qilish va ulardan foydalanish lozim.

 

Manfaatlar to‘qnashuvi − ichki valyuta bozori ishtirokchilarining xizmat majburiyatlarini ob’yektiv va xolisona bajarishiga ta’sir ko‘rsatadigan bevosita yoki bilvosita shaxsiy manfaatlar to‘qnashuvi, bozor manipulyasiyasi − bozor ishtirokchilari tomonidan bozorning boshqa ishtirokchilarini chalg‘itish va bozor faoliyatini barqaror ishlashiga to‘sqinlik qilish maqsadida chalg‘ituvchi narxlarda buyurtmalarning kiritilishi yoki talab, taklif va savdolar hajmining sun’iy ravishda oshirilishi muvofiqlashtirilmoqda.

 

Axborot almashish va kommunikasiya − bozor ishtirokchilari o‘rtasida ma’lumotlar shaffofligi ta’minlanishi, axborot almashinuvida professional yondashilish hamda noto‘g‘ri ma’lumotlar tarqatilmaslik, mijozlar bilan munosabatlar − bozor ishtirokchilari va o‘z mijozlari o‘rtasidagi axloqiy me’yor, professionallikka amal qilingan munosabatlar.

 

Bugungi kunda «Ichki valyuta bozorida Etika kodeksi» tijorat banklari tomonidan qabul qilingan holda ichki valyuta bozoridagi faoliyati kodeks qoidalariga muvofiqlashtirilmoqda.