O‘zbekistonda ikki turdagi yangi avtomashina ishlab chiqariladi
Shuningdek, avtomobil sanoatida eksport hajmini 1 mlrd dollarga yetkazish rejalashtirilmoqda.
“UzAuto Motors” ikkita yengil mashina modelini ishlab chiqarishni yo‘lga qo‘yadi. Bu haqda Yangi O‘zbekistonning 2022–2026 yillarga mo‘ljallangan taraqqiyot strategiyasida ma’lum qilingan.
Qayd etilishicha, 2022-yildan avtomobil sanoatida kooperatsiyani yanada rivojlantirish orqali ishlab chiqarish hajmini 1,4 barobarga, eksport hajmini 2 barobarga ko‘paytirish ko‘zda tutilgan.
Sohadagi mavjud korxonalarning ishlab chiqarish quvvatlarni oshirish maqsadida:
yangi birlashgan global platformasiga (“GEM”) o‘tish orqali yillik quvvati 190 ming dona bo‘lgan 2 ta yangi yengil avtomobil modelini ishlab chiqarish;
“UzAuto Motors” Xorazm viloyati filialining avtomobil ishlab chiqarish quvvatini 70 mingdan 100 mingtaga oshirish rejalashtirilgan.
Shuningdek, eksport hajmini 2026-yilga qadar 1 milliard dollarga yetkazish bo‘yicha yo‘l xaritasi ham ishlab chiqiladi. Jumladan, “Nexia” avtomobillarini Qozog‘istonda to‘liq siklda ishlab chiqarishni yo‘lga qo‘yish orqali yiliga 30 ming donagacha mashinokomplektlar eksporti amalga oshiriladi.
