Ukraina frontdagi askarlarning 30 foizini jangovar robotlar bilan almashtirmoqchi
Mart oyining o‘zida robotlashtirilgan komplekslar frontda logistika va evakuatsiya bo‘yicha 9 mingdan ortiq vazifani bajargan.
Ukraina Qurolli kuchlari front chizig‘ida jangovar robotlardan foydalanishni keskin kengaytirib, 2026-yilga borib eng murakkab hududlarda shaxsiy tarkibning 30 foizigacha qismini texnologiyalar bilan almashtirishni maqsad qilgan. Bu haqda The Moscow Times xabar berdi.
Vladimir Zelenskiyning bildirishicha, Ukraina armiyasi urush davomida ilk bor dushman pozitsiyasini faqat uchuvchisiz platformalar — yerusti robotlashtirilgan komplekslar va dronlar yordamida egallab, bir nechta askarni asirga olgan. Mazkur operatsiya o‘tgan yozda amalga oshirilgan. Hozirda bunday texnologiyalar 150 dan ortiq bo‘linmada qo‘llanilmoqda.
Politico nashriga ko‘ra, operatsiyani boshqargan qo‘mondon Nikolay Zinkevich piyodalarni o‘q ostidan olib chiqish va xavfli vazifalarni robotlar orqali bajarish ustuvor vazifa hisoblanishini bildirgan.
“2026-yilga mo‘ljallangan maqsadimiz — frontning eng murakkab hududlarida shaxsiy tarkibning 30 foizigacha qismini texnologiyalar bilan almashtirish”, — degan Zinkevich.
Ma’lumotlarga ko‘ra, Ukraina tomoni son jihatdan ustun bo‘lgan Rossiya armiyasiga qarshi uchuvchisiz texnologiyalarni faol qo‘llamoqda. Qayd etilishicha, dushman tomonning tirik kuchiga yetkazilayotgan zararning qariyb 80 foizi aynan dron va robotlar hissasiga to‘g‘ri keladi.
Carnegie Endowment for International Peace tahliliga ko‘ra, Ukrainadagi jangovar harakatlarda yangi texnologiyalarning keng qo‘llanilishi urush olib borish uslublarini sezilarli darajada o‘zgartirmoqda. Hisobotda bir necha yil avval tasavvur qilish qiyin bo‘lgan qurol tizimlari bugungi kunda jang maydonida ustunlik qilayotgani keltirilgan.
Xabarga o‘ra, 2025-yildan boshlab Ukraina Mudofaa vazirligi qariyb 40 turdagi yangi robot tizimlarini tasdiqlagan va yil yakuniga qadar armiyaga 15 mingga yaqin qurilma yetkazib berilgan. 2025-yil noyabrida ulardan 67 ta bo‘linma foydalangan bo‘lsa, 2026-yil mart oyiga kelib bu ko‘rsatkich 167 taga yetgan.
Mudofaa vaziri Mixail Fedorovning ma’lum qilishicha, faqat mart oyining o‘zida robotlashtirilgan komplekslar frontda logistika va evakuatsiya bo‘yicha 9 mingdan ortiq vazifani bajargan. Vazir frontdagi logistika jarayonlarini to‘liq robotlashtirish rejalashtirilayotganini ta’kidlagan.
Shuningdek, 2026-yilning birinchi yarmida 25 ming dona yerusti robotlashtirilgan kompleks yetkazib berish bo‘yicha shartnomalar tuzilishi kutilmoqda. Bu ko‘rsatkich 2025-yildagi umumiy yetkazib berish hajmidan ikki baravarga ko‘p ekani qay etilgan.
Harbiylar bildirishicha, Xarkov viloyatida o‘tkazilgan operatsiya davomida Ukraina kuchlari dushman pozitsiyasini piyodalarsiz va yo‘qotishlarsiz egallagan. Operatsiya jarayonida yerusti kamikadze-robotlar va dronlardan foydalanilgan, natijada ikki nafar rossiyalik harbiy taslim bo‘lib, asirga olingan.
Tahlilchilarga ko‘ra, jangovar robotlarning keng joriy etilishi harbiy sohada 1920–1930-yillarda yuz bergan texnologik o‘zgarishlarga qiyoslanmoqda.
