Surxondaryoda IIBga tegishli “avtozak” Neksiya bilan to‘qnashdi
Ikki kishi halok bo‘lgan, yana bir kishi og‘ir tan jarohatlari bilan shifoxonaga yotqizilgan.
Surxondaryo viloyati Denov tumanida IIBga qarashli avtozak va fuqarolardan biriga tegishli Neksiya to‘qnashishi oqibatida ikki kishi halok bo‘lgan.
Viloyat IIB YHXB axborot xizmatining xabar berishicha, hodisa 2024 yil 19 yanvar soat 20:00 larda sodir bo‘lgan.
Denov tumani Vodiy mahallasi hududidan o‘tuvchi “4R 108 V” avtomobil yo‘lining 3-kilometrida 50 yoshli haydovchi Neksiya mashinasini boshqarib kelayotib, yo‘lni kesib o‘tayotgan piyodani urib yuborgan. So‘ng boshqaruvni yo‘qotib qarama-qarshi yo‘nalishdan kelayotgan Surxondaryo viloyati IIB xo‘jalik bo‘limiga tegishli “GAZon Nekst” rusumli “avtozak” maxsus transport vositasining yo‘nalishiga chiqib ketib, u bilan to‘qnashgan.
Hodisa oqibatida Neksiya urib yuborgan 41 yoshli piyoda og‘ir tan jarohatlari bilan shifoxonaga yotqizilgan. Neksiya haydovchisi va bir nafar yo‘lovchisi shifoxonada vafot etgan. Qayd etilishicha, hozirda holat yuzasidan Denov tuman prokuraturasi tomonidan tergov harakatlari olib borilmoqda.
