"Hududiy elektr tarmoqlari" 15,2 mln so‘mga bir dona shaxmat sotib oldi
Holat yuzasidan "Hududiy elektr tarmoqlari" maʼlumot berdi.
Ijtimoiy tarmoqlarda "Hududiy elektr tarmoqlari" AJ 15 mln 200 ming so‘mga bir dona yong‘oqdan ishlangan shaxmat xarid qilgan, shuningdek, 25 mln 700 ming so‘mga bir dona “kartina” va 17 mln 300 ming so‘mga bir dona “panno” sotib olgani haqida xabarlar tarqaldi. Holat yuzasidan "Hududiy elektr tarmoqlari" maʼlumot berdi.
Bayonotda aytilishicha, "Hududiy elektr tarmoqlari" AJ tomonidan xorijiy ekspertlar ishtirokida qator xalqaro ilmiy-texnik anjumanlar, nufuzli mehmonlar tashrifi doirasida tegishli bayonnoma asosida tadbirlar o‘tkazilib kelinmoqda.
Maʼlum qilinishicha, mazkur tadbirlar qatnashchilari, nufuzli mehmon va xorij ekspertlariga tarqatma materiallari va esdalik sovg‘alari taqdim etilishi belgilangan.
"Keltirib o‘tilgan buyumlar E-xarid maxsus elektron portali orqali sotib olinib, energetika tarmog‘iga oid xalqaro shartnomalarni imzolash tadbirlarida nufuzli mehmonlarga sovg‘a sifatida topshirilgan", — deyiladi xabarda.
Taʼkidlanishicha, jamiyat tomonidan bu kabi esdalik sovg‘alarni tanlashda milliy hunarmandchilik, xalq badiiy va amaliy sanʼatini rivojlantirish, soha vakillarini har tomonlama qo‘llab-quvvatlash masalalariga birlamchi yondashiladi.
