Bo‘stonliqda “Chimyon” xalqaro umummavsumiy kurorti quriladi
Kurortni qurish maqsadida O‘zbekiston va Fransiya o‘rtasida 47,9 million yevro miqdoridagi qarz mablag‘larini jalb qilish yuzasidan kelishuv imzolandi.
Toshkent viloyati Bo‘stonliq tumanida “Chimyon” xalqaro umummavsumiy kurorti quriladi. Bu 8 avgust kuni prezident tomonidan imzolangan tegishli qarorda nazarda tutilgan.
“Chimyon” xalqaro umummavsumiy kurortini qurish maqsadida O‘zbekiston va Fransiya o‘rtasida 47,9 million yevro miqdoridagi qarz mablag‘larini jalb qilish yuzasidan kelishuv imzolandi.
Loyiha doirasida Milliy bank tomonidan 20 million dollar miqdorida taqdim etiladigan kreditning garov taʼminoti sifatida “Beldirsoy-Chimyon-Nanay” xalqaro umummavsumiy kurortini qurish va ekspluatatsiya qilish bo‘yicha loyiha ofisi” davlat unitar korxonasi tomonidan sotib olinadigan uskunalar belgilandi.
Qayd etilishicha, Suv taʼminoti va oqova suv obyektlari qurilishi bo‘yicha injiniring kompaniyasi suv taʼminoti va oqova suv tarmoqlarini quradi. "Hududiy elektr tarmoqlari” elektr energiyasi bilan taʼminlaydi.
Avtomobil yo‘llari qo‘mitasi loyiha doirasida 2 515 m balandlikdagi o‘rta-stansiyasigacha vaqtinchalik yo‘l o‘tkazadi.
“O‘zbektelekom” telekommunikatsiya tarmoqlarini tortish va o‘rnatish ishlarini bajaradi.
Hujjat bilan transport tashkilotlari avtomobil yo‘llarida og‘ir yukli va yirik gabaritli transport vositalarining harakatlanishi uchun to‘lovlardan ozod etildi.
