Respublikaning qator hududlarida o‘qishga kiritib qo‘yish uchun pul olgan OTM xodimlari ushlandi
Xususan, Andijon davlat universiteti xodimi, Chirchiq davlat pedagogika universitetining bo‘lim boshlig‘i va boshqa bir qator shaxslar qo'lga olindi.
DXX respublikaning qator hududlarida OTMga o‘qishga kiritish bilan bog‘liq noqonuniy holatlarga chek qo‘ydi.
Jumladan Andijon davlat universiteti xodimi yuqori lavozimlarda ishlovchi tanishlari orqali fuqaroni mazkur oliy o‘quv yurtining sirtqi bo‘limiga o‘qishga kiritib qo‘yish evaziga 4 ming AQSH dollari olgan vaqtida ushlangan.
Shuningdek, Qarshi shahrida yashovchi, 1992 yyilda tug‘ilgan shaxs o‘zganing ishonchiga kirib, mansabdor tanishlari yordamida uni Qarshi davlat universitetiga o‘qishga kiritib qo‘yish evaziga 3 ming AQSH dollari olgan vaqtida ushlandi.
Bundan tashqari, Chirchiq davlat pedagogika universitetining bo‘lim boshlig‘i 2 nafar fuqaroning Rossiya Federatsiyasi oliy o‘quv yurtidagi o‘qishini o‘zi faoliyat yuritayotgan universitetga ko‘chirib berish va 2 nafar fuqaroga ingliz tilini bilish bo‘yicha xalqaro sertifikat olib berish evaziga 10 100 AQSH dollari olgan vaqtida ushlandi.
Boshqa holatda esa Chirchiq davlat pedagogika universiteti o‘qituvchisi fuqaroni ushbu oliy o‘quv yurtining maktabgacha va boshlang‘ich taʼlimda jismoniy tarbiya yo‘nalishiga o‘qishga kiritib qo‘yish evaziga 3 ming AQSH dollari olgan vaqtida ushlandi.
Yana bir holatda Qibray tumanida yashovchi er-xotin o‘zlarining tanishlari yordamida fuqaroni Chirchiq davlat pedagogika universitetiga o‘qishga kiritib qo‘yish evaziga 3500 AQSH dollari olgan vaqtlarida ushlandi.
Hozirda barcha holatlar yuzasidan mazkur shaxslarga nisbatan Jinoyat Kodeksining 168- (firibgarlik) va 28,211- (pora berish) moddalari bilan jinoyat ishlari qo‘zg‘atilib, tergov harakatlari olib borilmoqda.
