Toshkentda ichida odamlar bo‘lgan liftning qulab tushish sabablari ochiqlandi

 

Toshkent shahrining Yangihayot tumanidagi ko‘p qavatli uylarning birida liftda nosozlik yuz berib, odamlar jarohatlangani haqida xabar berilgandi. Sanoat xavfsizligi davlat qo‘mitasi holat yuzasidan o‘rganish ishlari natijasi haqida maʼlumot berdi.

Aniqlanishicha, 18-iyun kuni taxminan soat 16:00 da Toshkent shahri, Yangi hayot tumani, "Yangi Darxon" MFYda joylashgan 17-sonli 16-qavatli ko‘p xonadon uy 2023-yil aprel oyida foydalanishga topshirilgan. Ko‘p qavatli uydagi lift Turkiya korxonasi tomonidan 2022-yilda ishlab chiqarilgan.

 

Yuk ko‘tarish quvvati 1000 kg bo‘lgan lift qurilmasi 16-qavatdan 1-qavatga harakatga kelgach, liftning tezligini nazorat qiluvchi yaʼni to‘xtash lozim bo‘lgan etajga yaqinlashgan lift kabinasini sekinlatuvchi (datchik zamedleniya) qurilmasi nosozligi sababli tezlik kamaymaganligi va 1-qavatga yaqinlashganda liftning avtomatik tormoz tizimi ishga tushib to‘xtaganligi va tezlik kamaymaganligi tufayli shaxtada o‘rnatilgan bufer qismiga kelib o‘rilganligi taxmin qilinmoqda. 

 

Natijada lift to‘xtagandan so‘ng mazkur mavzedagi domlarga xizmat ko‘rsatuvchi injinering kompaniyasi "Premium Promotion" MCHJning liftlarga xizmat ko‘rsatuvchi mutaxassislari tomonidan eshikni ochib liftdan 11 kishini chiqarib olgan, bulardan 3 kishi turli xil sinishlar bilan shifoxonaga yotqizilgan.

 

Hozirda ushbu hududdagi ko‘p qavatli uylarga xizmat ko‘rsatuvchi kompaniyaga tegishli liftlarni qayta navbatdan tashqari texnik nazoratdan o‘tkazish ishlari amalga oshirilmoqda.

 

Bundan tashqari, mutaxassislar tomonidan Toshkent shaxri va viloyatlardagi ko‘p qavatli uylarda o‘rnatilgan lift qurilmalarni texnik ko‘rikdan o‘tkazish ishlari boshlangan.