Qurbon hayitida o‘zbekistonliklar necha kun dam olishi maʼlum bo‘ldi
O‘zbekistonda Qurbon hayiti munosabati bilan respublika ichidagi yo‘nalishlarda chegirmalar berilishi boshlandi.
Uzbekistan Airways milliy aviakompaniyasi matbuot xizmatining maʼlum qilishicha, joriy yil 8-iyunidan boshlab aviakompaniya Qurbon hayitini nishonlash kunlari — 28-iyundan 2-iyulga qadar amalga oshirilishi rejalashtirilgan ichki reyslarda barcha aviachiptalarga 50 foizlik chegirma taqdim etmoqda.
Avvalroq, 2023-yilda respublikada Qurbon hayitini nishonlashning eng ehtimoliy sanasi 28-iyun ekanligi xabar qilingan edi.
O‘tgan yilning dekabr oyida prezident rasmiy sanalarni nishonlash davrida qo‘shimcha ishlanmaydigan kunlarni belgilash va 2023-yilda dam olish kunlarini ko‘chirish to‘g‘risidagi farmonni imzolagan edi. Davlat rahbari joriy yilning 20-aprel kuni yangi farmoni bilan yuqoridagi hujjatga o‘zgartirishlar kiritdi. Yangi farmonga ko‘ra, ish haftasi turidan qatʼi nazar, 30-iyun (juma) barcha xodimlar uchun qo‘shimcha dam olish kuni deb eʼlon qilindi.
Bundan tashqari, 6 kunlik ish haftasiga ega bo‘lgan ishchilar uchun 1 iyul (shanba) qo‘shimcha dam olish kuni bo‘ladi.
Yuqoridagi maʼlumotlarga asoslanib, O‘zbekiston aholisi Qurbon hayitida ketma-ket kamida uch kun dam oladi, degan xulosaga kelish mumkin:
-
2023-yil 30-iyun (juma) - ish haftasi turidan qatʼi nazar, barcha xodimlar uchun qo‘shimcha dam olish kuni;
-
2023-yil 1-iyul (shanba) - 6 kunlik ish haftasi bo‘lgan xodimlar uchun qo‘shimcha dam olish kuni;
-
2023-yil 2-iyul (yakshanba) taqvim bo‘yicha dam olish kuni hisoblanadi.
Ammo Qurbon hayiti 29-iyun (payshanba) kuni nishonlanadigan bo‘lsa, o‘zbekistonliklar to‘rt kun, agar 28-iyun kuni bo‘lsa - ketma-ket besh kun dam olishadi.
