Saratonga oid olti afsona
Bugun onkologik kasalliklarga qarshi kurash kuni.
4 fevral butunjahon saratonga qarshi kurash kuni sifatida nishonlanadi. Har yili dunyoda ushbu kasallik haqida ko‘proq maʼlumotga ega bo‘lish uchun ko‘plab ishlar amalga oshiriladi.
Saratonga qarshi kurash xalqaro ittifoqi kasallikning oldini olish bo‘yicha chora-tadbirlarni amalga oshiradigan tashkilot bo‘lib, hozirda u o‘z ichiga onkologik kasalliklarga qarshi kurashga ixtisoslashgan 900 dan ortiq tashkilotni jamlagan.
Amalga oshirilayotgan ishlarga qaramay, saraton haqida haqiqatdan yiroq qarashlar odamlar orasida keng tarqalgan. “TASS” agentligi ularning oltitasini keltiradi.
Birinchi afsona: saraton yuqumli
Saratonni boshqalardan yuqtirib bo‘lmaydi. Bir binoda yashash, umumiy kiyimlar yoki bir xil buyumlardan foydalanish xavfsiz.
Ikkinchi afsona: saraton har doim o‘lim bilan tugaydi
Agar kasallik boshlang‘ich davrda aniqlansa va bemor to‘g‘ri muolaja qilinsa, to‘liq tuzalmasa ham, uzoq umr ko‘rish imkoniyati bor.
Uchinchi afsona: Shirinliklar saratonga “yordam beradi”
Odam organizmidagi barcha hujayralar glyukoza orqali quvvatlanadi. Shirinlik isteʼmolini cheklash mumkin, ammo parhezni faqat vrach ko‘rsatmasi bilan boshlash kerak.
To‘rtinchi afsona: saraton — yomon ishlar uchun jazo
Saratonga turli odamlar chalinishi mumkin. Baʼzida bu afsona muolajaga xalal beradi: bemorlar saraton jazo deb hisoblaydi va muolaja olmaydi.
Beshinchi afsona: Saratonga qarshi preparat bor, ammo uni sir tutishadi
Hozirda saratonga qarshi universal dori mavjud emas. Ammo xalqaro tibbiy hamjamiyat bu yo‘nalishda doimiy tadqiqotlar olib boradi
Oltinchi afsona: xalq tabobati bilan saratonni davolash mumkin
Bu ayniqsa xavfli. Ayrim odamlar anʼanaviy tibbiyotga ishonib, professional muolajadan voz kechadi va bu ko‘pincha o‘lim bilan tugaydi.
