Hokimlar qo‘liga o‘tib borayotgan taʼlim
Yoxud maktablarda darslar onlayn bo‘lishini kim hal qilyapti?
O‘zbekistonda boshlangan va haligacha davom etayotgan anomal sovuq sabab respublikadagi taʼlim muassasalarida qishki taʼtil uzaytirilgandi. Xususan, maktablarda taʼtil 28-dekabrdan boshlanib, 10-yanvarda tugashi kerak edi. Ob-havoning keskin sovib ketishi ortidan o‘quvchilarning dam olish kunlari avvaliga 17-yanvargacha, keyinroq 22-yanvarga qadar davom etadigan bo‘ldi.
Va nihoyat 23-yanvardan respublikadagi barcha maktablarda III chorak darslari boshlandi. 22-yanvar kuni vazirlik issiqlik taʼminotida muammosi bo‘lgan maktablar o‘qishni vaqtincha masofadan olib borishlariga ruxsat berdi. Shundan kelib chiqib, jami 717 ta maktabda o‘quv mashg‘ulotlari masofaviy shaklda tashkil etilgan.
Shu o‘rinda savol tug‘iladi: darslarning onlayn yoki oflayn bo‘lishini kim hal qilmoqda? Vazirlik va uning hududiy boshqarmalarimi yoki mahalliy hokimliklar?
Zamon.uz kuzatuviga ko‘ra, Toshkentdagi maktablarning 57 tasida taʼlim onlayn shaklda olib borilishi shahar XTBB rasmiy telegram kanalida 22-yanvar kuni soat 20:40 da eʼlon qilingan. Chilonzor tuman hokimligi esa o‘z hududidagi qaysi maktablarda darslar onlayn bo‘lishini o‘sha kuni soat 18:17 da maʼlum qilib ulgurgandi.
Andijonda biroz boshqacha holat: viloyat hokimligi rasmiy telegram kanalida bu bo‘yicha hech qanday maʼlumot eʼlon qilmagan. Lekin Xalq taʼlimi boshqarmasi hali onlayn taʼlimga ruxsat berilmasidan avval (20-yanvar) viloyatdagi 16 ta maktabda dars mashg‘ulotlari masofaviy tarzda olib borilishini bildirgan.
Namangan viloyatidagi ayrim maktablarda darslarning onlayn tashkil etilishiga vazirlik bunga ruxsat berishidan 5 kun oldin qaror qilingan. 16-yanvar kuni viloyat hokimligida bu bo‘yicha yig‘ilish o‘tkazilgan va xuddi shu kuni Xalq taʼlimi boshlig‘ining ham 14-sonli buyrug‘i chiqqan. Jamoatchilik esa bundan darslar boshlanishidan bir kun oldin xabar topgan.
Qashqadaryo viloyati rasmiylari darslar onlayn o‘tiladigan maktablar ro‘yxatini bir kun kechikib eʼlon qilgan. Bu haqdagi xabar esa dastlab hokimlik matbuot xizmati tomonidan, keyinroq viloyat XTB tomonidan ochiqlangan.
Eslatib o‘tamiz, 10-yanvar kuni qishki taʼtil davrini uzaytirish vakolati hududdagi ob-havo sharoitlarini inobatga olgan holda mahalliy hokimliklarga o‘tkazilgandi.
Vazirlar Mahkamasining tegishli bayoniga asosan Qoraqalpog‘iston Respublikasi Vazirlar Kengashi, viloyatlar va Toshkent shahri hokimliklariga maktabgacha, umumtaʼlim, o‘rta maxsus, professional hamda oliy taʼlim tashkilotlarida qishki taʼtil davrini uzaytirish yoki uzaytirmaslik vakolati berilgan.
Vazirlik taqdim etgan mazkur xabarda bu vakolat qachongacha amal qilishi aniq yozilmagan. Shuningdek, hokimliklar tomonidan darslarni onlayn tashkil etishga ruxsat berilishi mumkinligi ham aytilmagan
Zamon.uz taʼtil uzaytirilishi bilan bog‘liq noaniqliklar, mahalliy hokimliklarga taʼlim sohasida berilgan vakolatlar yuzasidan Maktabgacha va maktab taʼlimi vazirligi matbuot kotibi bilan telefon orqali bog‘landi, lekin aniq javob ololmadi.
“Keyingi yili nima bo‘lishini oldindan bilmaymiz”, — deya qisqa javob berdi L. Rustamova.
Bu bo‘yicha rasmiylardan qo‘shimcha maʼlumot va izoh kutib qolamiz.
