O‘qishini Rossiyadan O‘zbekistonga “perevod” qiluvchilar ro‘yxati tasdiqlandi
Bu bo‘yicha vazirlik maʼlumot berdi.
Rossiyaning 8 ta hududidagi o‘qishini ko‘chirishga istisno tariqasida ruxsat berilgan bir guruh talabalar ro‘yxati tasdiqlandi. Bu haqda Oliy taʼlim, fan va innovatsiyalar vazirligi xabar qildi.
Tashqi ishlar vazirligi xulosasiga binoan, Ukraina Respublikasi bilan chegaradosh bo‘lgan Rossiya Federatsiyasi (Kursk, Bryansk, Belgorod, Voronej, Rostov, Krasnodar, Qrim, Sevastopol) hududlaridagi oliy taʼlim muassasalaridan o‘qishi O‘zbekiston Respublikasidagi davlat oliy taʼlim muassasalariga ko‘chirilishi ruxsat etilgan bir guruh talabalar ro‘yxati tasdiqlandi.
“Ushbu ro‘yxatga kiritilgan talabalar o‘zlari hujjat topshirgan oliy taʼlim muassasasining o‘qishni ko‘chirish bo‘yicha masʼullariga uchrashishlari so‘raladi.
Belgilangan tartibda my.dtm.uz sayti orqali ro‘yxatdan o‘tgan, ammo ushbu tasdiqlangan ro‘yxatda ism sharifi keltirilmagan fuqarolar bo‘yicha tegishli tashkilot xulosasi kutilmoqda. Natijasi yuzasidan yaqin kunlarda qo‘shimcha maʼlumot eʼlon qilinadi”, — deyiladi xabarda.
