Bokuda o‘zbekistonlik va ozarbayjonlik kinoijodkorlar uchrashuvi bo‘lib o‘tdi
Taniqli ozarbayjon jamoat arbobi haqidagi serialda o‘zbek kino ustalari ham ishtirok etishi aytilmoqda.
Boku media markazida o‘zbekistonlik va ozarbayjonlik kinoijodkorlar uchrashuvi o‘tkazildi. Mazkur uchrashuvda o‘zaro hamkorlikdagi loyihalarni amalga oshirish yuzasidan ham kelishuvlarga erishildi.
"Ikki mamlakat rahbarlari – Shavkat Mirziyov va Ilhom Aliyev rahbarligida mamlakatlarimiz o‘rtasida turli yo‘nalishlarda aloqalarimizni mustahkamlash borasida keng qamrovli ishlar olib borilyapti", — dedi O‘zbekiston Respublikasi Kinematografiya agentligi Bosh direktori Firdavs Abduxoliqov. "Shu asosda kinematografiya sohasidagi hamkorlikni yana-da rivojlantirishimiz kerak. Buning uchun esa salohiyat va imkoniyatlarimiz yetarli".
Ozarbayjonlik yosh kinoijodkorlar “Ipak yo‘li durdonasi” Toshkent xalqaro kinofestivalida ishtirok etishganini faxr bilan yodga olishdi. Ayni paytda ozarbayjonlik kino ustalari taniqli jamoat arbobi, bokulik sanʼat va madaniyat homiysi, yirik sanoat xodimi Hoji Zaynulobiddin Tag‘iyev haqida sakkiz qismli badiiy film yaratilayotgani, filmning maʼlum qismi O‘zbekiston hududida suratga olinishini maʼlum qilishdi.
Zaynulobidin Tag‘iyev o‘z daromadining salmoqli qismini xayriya ishlariga, xalqning savodxonlik darajasini oshirish, ilm-maʼrifatni rivojlantirishga sarflagan. Uning moddiy va maʼnaviy ko‘magida mamlakatda qator taʼlim muassasalari, matbuot nashrlari tashkil qilingan.
Eʼtiborli tomoni, Hoji Zaynulobidin Tag‘iyev Markaziy Osiyo davlatlari, xususan, Buxoro amirligi bilan doimiy aloqada bo‘lgan. Amir Abdulahadxon, Amir Olimxon va boshqa davlat arboblari Tag‘iyev bilan tez-tez uchrashib, iqtisodiy sohada muzokaralar olib borishgan. Buxoro amirligi xonadoni vakillari Bokuda, Tag‘iyevning xonadonida bir necha marotaba mehmonda bo‘lishgan. Ayni paytda Tag‘iyevning Ozarbayjon Davlat tarixi muzeyiga aylantirilgan shaxsiy saroyida Buxoro hukmdorlarining bir qancha esdalik sovg‘alari saqlanadi.
O‘zbekiston delegatsiyasi rahbari Firdavs Abduxoliqov Tag‘iyevning hayoti va faoliyati bugungi yosh avlod uchun namuna bo‘la olishini, uning Buxoro amirligi bilan aloqalarini chuqurroq o‘rganish, kino vositasida bu boradagi maʼlumotlarni tomoshabinlarga yetkazish lozimligini qayd etdi. Mazkur serialning maʼlum qismlarini O‘zbekistonda suratga olinishida zarur yordam ko‘rsatilishi, serialni yaratishda o‘zbek sanʼatkorlari ham bevosita ishtirok etishi mumkinligini taʼkidladi.
Ozarbayjonlik kinoijodkorlar bu masalada hamkorlikka tayyor ekanliklarini aytib, mazkur taklif uchun samimiy minnatdorlik bildirishdi.
