Andijon shahrida yana yong‘in yuz berdi
Yong‘inni bartaraf etish uchun 4 ta yong‘in-qutqaruv ekipaji jalb qilingan.
Bugun, 7 dekabr kuni soat 04:04 da Andijon shahar, «Saʼdiy» MFY, Eski O‘sh ko‘chasidagi uylarning birida yong‘in ro‘y bergan to‘g‘risida shahar favqulodda vaziyatlar bo‘limiga xabar kelib tushgan. Shunga ko‘ra 4 ta yong‘in-qutqaruv ekipaji voqea joyiga yetib borib, yong‘inni bartaraf etgan.
"Yong‘in oqibatida uyning 70 kv.m maydonda shift, tom qismi va uy-ro‘zg‘or buyumlari yonib zararlangan. Qutqaruvchilarning tezkor harakatlari natijasida uyning 180 kv.m maydoni yong‘indan saqlab qolingan. Hodisa oqibatida tan jarohati olgan va halok bo‘lganlar yo‘q. Hozirda yong‘in sababi va moddiy zarar miqdori aniqlanmoqda", — deyiladi FVV maʼlumotida.
Eslatib o‘tamiz, o‘tgan oy ham Andijon shahrida yirik yong‘in yuz bergandi.
